Примерное время на чтение статьи 0 минута

Ык ярында.

Зифа талларыңа сыендым да,

Талгын суларыңда юындым.

Сандугачның сихри аһәңендә

Шәфакъ нурларында коендым.

Талларыңнан күз яшедәй тамчы

Үләннәргә тама тып та тып.

Камышлыкта оя кора кошлар,

Ерак-ерак җирләрдән кайтып.

Чәчәкләр дә күз кызыша әнә,

Бер-берсенә серле эндәшә.

Курай моңы белән тургай җыры

Җиһан булып яңгырый янәшә.

Тирәкләрне дәртле тирбәндереп

Иркә җилләр килеп уйнаклый.

Шушы хозурлыкта ялгыз күке

Сагыш тулы җырын кабатлый.

Яралы җан бары табигатьтә

Дәва таба ала икән лә.

Әнкәм назын,җылы сулышын тоям

Шушы Ык ярына киләмдә.